東網電視
更多新聞短片
澳洲積臣艾雲亂軍中開紀錄。(Getty Images)
世盃外亞洲區第三圈C組，中國主場0比2不敵澳洲，輸埋呢場，中國已經肯定無緣小組前兩名直接晉級資格，仲有機會爭3、4名打附加賽，不過今場中國確實輸得肉酸，尤其輸第2球門將王大雷「屙蛋」漏入，真係打擊士氣。
國足同「袋鼠兵」實力差距明顯，首循環中國作客輸1比3，今次雖有主場之利，但幫助不大，開賽16分鐘積臣艾雲殺入禁區，擺脫兩個中國守將熨射死角入網，澳洲輕鬆領先1比0。
不過國足輸第2球先最致命，澳洲右路組織攻勢，國足8個球員回防，都阻止唔到維里皮利起腳，個波冇乜角度，向住門將王大雷正面而來，勢估唔到王大雷接球「屙蛋」漏入，中國輸到0比2。
下半場國足換入剛入籍嘅巴西兵塞吉爾尼奧落場博一博，搶番唔少攻勢，但最後都追唔番，最終輸0比2完場。中國落敗後，以6分排C組榜末，尚餘2輪情況下無法追上13分排第2嘅澳洲，無緣直接晉級，不過中國仍有機會爭3、4名嘅附加賽資格，出線仲未絕望。
