東網電視
更多新聞短片
奧迪加特同夏蘭特喺挪威合作無間。
周三(26日)凌晨世盃外歐洲區I組賽事，挪威延續近期超強氣勢，作客4比2大破以色列，小組兩戰全勝排榜首。挪威有「英超孖寶」完美連線，馬田奧迪加特今場助攻「戴帽」，艾寧夏蘭特亦打破54年入球紀錄。呢支北歐勁旅最近4連勝入18球，火力驚人！
信心爆棚嘅挪威今場作客照攻，39分鐘大衞禾菲接應奧迪加特妙傳先開紀錄，以色列55分鐘追平後，奧迪加特隨即助攻阿歷山大索洛夫入波，再度領先。基斯杜化艾查65分鐘為挪威拉開到3比1，83分鐘奧迪加特交出今場第3次助攻，造就艾寧夏蘭特射成4比1，以色列補時追番球，只係輸得冇咁肉酸。
奧迪加特近2場世盃外交出4次助攻，而夏蘭特今場入佢41場國際賽第40球，成為自1971年德國前鋒梅拿(33場40球)後，最快喺國家隊入40球嘅歐洲球員。挪威連續4場入至少4球，奧迪加特賽後表示：「我哋發展出一個好好嘅作戰計劃，球員對自己所做充滿信心，進攻上好咗好多，可以透過唔同方式入波或創造機會，我自己亦都踢出水準。」
