東網電視
更多新聞短片
伊朗連續4屆殺入世盃決賽周。
世盃外進行得如火如荼，繼3支東道主美國、加拿大同墨西哥，同埋日前出線嘅日本、新西蘭外，伊朗同阿根廷周三(26日)亦正式鎖定決賽周資格，令明年世盃落實參賽球隊增加到7隊。
伊朗喺世盃外亞洲區第3圈A組，憑射手泰尼米梅開二度，主場2比2逼和排次席嘅烏茲別克，喺剩2輪情況下領先第3位嘅阿聯酋7分，提早鎖定小組前2名資格，連續4屆躋身世盃決賽周。
不過英國《衞報》報道，伊朗出線可能製造尷尬情況，事關伊朗同主辦國之一嘅美國政局緊張，早前有消息指美國總統特朗普考慮針對43個國家，實施新一輪旅遊禁令，伊朗等國公民可能被全面暫停簽證、禁止入境，除咗球迷未必可以去睇波，就連伊朗職球員可唔可以入境都係未知數。
雖然2026年世盃係美國、加拿大同墨西哥3國合辦，但80場賽事有60場都係喺美國舉行，目前非東道主球隊當中，只有1個席位(A組第3種子)可以唔喺美國踢分組賽。
另外，周三朝早南美洲區賽事，由於玻利維亞同烏拉圭踢成0比0，令榜首阿根廷提前鎖定出線資格。
