東網電視
更多新聞短片
耶馬同雲達華治隔空駁火。
西班牙新星拉明耶馬過去1年極速上位，17歲已經係巴塞隆拿同西班牙嘅靈魂人物，日前歐國聯對荷蘭，耶馬就同荷蘭名宿雲達華治「開戰」，曾效力皇馬嘅雲達華治就寄語呢位超新星，小心自視過高「犯眾憎」。
西班牙喺歐國聯8強首回合打和荷蘭後，雲達華治批評耶馬比賽態度差，結果次回合耶馬加時入波，最後帶領西班牙射贏12碼出線，耶馬入波後一度拉低條波褲慶祝，賽後佢就貼上呢張慶祝相，配上雲達華治頭像，明顯係反擊呢位荷蘭名宿。
雲達華治近日就「懶好心」回應：「我會建議耶馬，唔好太在意一個超重前度球員嘅說話。喺17歲就受到萬般寵愛，你會覺得世界圍住你轉，但呢個唔係事實。足球充滿樂趣，但唔係世上最重要嘅事，如果你覺得自己係個神，你就會開始犯眾憎。」
