東網電視
更多新聞短片
伊基迪基今季為法蘭克福上陣38場入19球及8次助攻。(Getty Images)
伊基迪基上年冬季由巴黎聖日耳門(PSG)轉投法蘭克福後，愈戰愈勇，今季已有19球進帳，據悉呢位22歲法國新星引起阿仙奴關注，有意今夏出手收購佢，估計伊基迪基現時身價已達6,000萬歐元(約5億港元)。
伊基迪基3年前由蘭斯加盟PSG，被視為重點栽培新星，2022/23年球季上陣32場入4球，但其後不獲重用，上年冬季被外借去法蘭克福，今季被呢支德甲球隊以1,650萬歐元(約1.38億港元)買斷。
伊基迪基大踢爭氣波，今季為法蘭克福各項賽事上陣38場入19球及8次助攻，包括德甲有13球進帳。佢日前為法國U21上陣對英格蘭U21，更加上演「帽子戲法」入3球，協助法國U21贏5比3。
阿仙奴一直計劃簽入前鋒，但今年冬季轉會市場冇收穫，預料夏季會再出手，盛傳已將伊基迪基列為目標人物。不過，阿仙奴起碼要開出6,000萬歐元轉會費，先至有機會令法蘭克福放人，如果成事，法蘭克福1年之間，可以從伊基迪基身上獲得數倍「投資回報」。
