東網電視
更多新聞短片
哈利卡尼累積213個英超入球，僅次於入230球的舒利亞。(Getty Images)
前曼聯球探米克布朗接受《Football Insider》訪問，表示拜仁慕尼黑前鋒哈利卡尼想返回英超比賽，力爭打破舒利亞保持嘅英超最多入球紀錄，「雙紅」曼聯、利物浦都有意簽入呢位31歲英格蘭國腳。
米克布朗話：「哈利卡尼一直想打破舒利亞嘅英超最多入球紀錄，重返英超係實現目標嘅第一步，我認為佢今夏會考慮轉會。卡尼有能力穩佔任何一支英超球隊正選，問題係有幾多球會負擔得起佢嘅轉會費同薪酬。據我所知，好多人討論呢件事，曼聯想簽卡尼，另一個選擇係利物浦，佢哋財政比較穩健。」
曼聯2年前已經想簽入哈利卡尼，但佢選擇加盟拜仁，會方似乎仍然對呢位神鋒念念不忘。至於利物浦因為穆罕默德沙拿將於今夏約滿，另外2位前鋒達雲紐尼斯、路易斯迪亞斯亦有離心，有需要補充前鋒，哈利卡尼成為目標人選。
哈利卡尼職業生涯累積213個英超入球，僅次於入230球嘅舒利亞，以佢目前勇態，如果重返英超，相信要打破舒利亞嘅紀錄，並唔困難。
