東網電視
更多新聞短片
胡積臣上艦在望。(Getty Images)
斟掂阿歷山大阿諾特之後，皇家馬德里又有新目標，據報「銀河艦隊」打算今夏簽入般尼茅夫19歲中堅甸恩胡積臣，呢位6呎6吋長人剛為西班牙國家隊對荷蘭上陣，吸引皇馬注視，而佢解約金只須5,000萬鎊(約5億港元)，皇馬簽佢可謂全無障礙。
皇馬每季賽事頻繁，又多傷兵，中後場球員經常唔夠用，甸恩胡積臣「上艦」後不愁上陣機會，西班牙傳媒報道，皇馬不但睇好胡積臣前景，更視佢為球隊未來後防領軍人物，所以今夏對佢可謂志在必得。
對於胡積臣嚟講，假如今夏加盟皇馬，簡直係一步登天，呢位西班牙新晉國腳最初在祖雲達斯青訓出身，曾外借到羅馬，去年夏天般尼茅夫以1,500萬鎊(約1.5億港元)轉會費簽入，上陣27場入2球，球季未踢完已經受到歐洲多間豪門關注，佢本身係西班牙國腳，皇馬絕對係佢最佳去處，因此相信皇馬今夏可以輕易擊敗其他對手，簽入呢位長人中堅。
