東網電視
更多新聞短片
高爾彭馬(藍衫)今季英超入14球及6次助攻。(Getty Images)
車路士將於下周五(4月4日)凌晨出戰英超「倫敦打吡」主場對熱刺，呢支億萬大軍賽前收到好消息，中場靈魂人物高爾彭馬已經傷愈復操，有望參加今場大戰，無疑可以增添車仔勝算。
高爾彭馬喺早前歐協聯16強次回合對哥本哈根一役受傷，缺陣上場英超對阿仙奴，結果車路士輸0比1，導致各項賽事4連勝斷纜。
幸好近期有國際賽空檔，令高爾彭馬可以專心養傷，並喺周五(28日)歸隊操練。呢位22歲英格蘭球星今季英超有14球進帳及6次助攻，兩項數據都屬於隊內最多，高爾彭馬復出可以大大提升車路士攻力。
另外，車路士翼鋒馬度基亦已經傷愈復操，進攻人腳日趨完整。車仔現時排英超第4位，僅領先第5位曼城1分，為奪取前4位參加下屆歐聯，絕對冇失分空間。
