東網電視
更多新聞短片
拉舒福特轉會維拉後表現出眾。(Getty Images)
周日(30日)英足盃8強，阿士東維拉作客3比0輕取普雷斯頓晉級4強，準決賽會同水晶宮對壘。冬季由曼聯加盟嘅拉舒福特，今場表現神勇梅開二度，打破接近4個月嘅入球荒，「福仔」賽後坦言，非常享受離開曼聯後嘅日子。
維拉對住8強入面唯一非英超球隊，上半場被悶和0比0，但換邊後發力，拉舒福特59分鐘接應盧卡斯迪治尼傳中射入，5分鐘後再操刀12碼入多1球，加上積及藍斯71分鐘「埋齋」，維拉得以大勝3比0晉級。拉舒福特對上一次入波，已經係上年12月初，今場打破入球荒，轉會後嘅好表現終獲回報。
最近重返英格蘭國家隊嘅拉舒福特賽後表示：「自從嚟到維拉之後，感覺非常之好，入球對一個前鋒好重要，我之前(喺曼聯)冇乜點比賽，依家要一步一步嚟，狀態仲可以再提升。維拉係支好有雄心嘅球隊，希望喺每項比賽爭取最好成績，我好享受依家嘅足球！」
