東網電視
更多新聞短片
湯馬士梅拿(左)今季平均每場只踢36分鐘。(Getty Images)
根據德國《圖片報》及《踢球者》爆料，拜仁慕尼黑考慮到湯馬士梅拿薪酬太高，上陣時間少，拒絕同呢位35歲中場老將續約，意味梅拿效力拜仁一隊長達17年生涯將於今夏結束。
湯馬士梅拿出身於拜仁慕尼黑青年軍，2008年獲提升上一隊，並一直效力至今。呢位前德國國腳累積為拜仁上陣742場射入247球及273次助攻，屬於球隊史上最多次披甲球員。
不過，隨住湯馬士梅拿近年水準走下坡，加上隊內新力軍冒起，令佢上陣時間愈來愈少，今季平均每場只踢36分鐘，其中歐聯更加總共僅上陣10分鐘。雖然梅拿仍然希望留隊，但佢年薪高達1,700萬歐元(約1.4億港元)，屬於隊內高薪一族，會方考慮到「性價比」太低，決定唔同梅拿續約，佢將於今夏約滿自由身離隊。
盛傳美職及沙特阿拉伯球會有興趣簽入湯馬士梅拿，佢嘅前國家隊隊友馬高列奧斯上年夏天離開多蒙特，加盟洛杉磯銀河，一旦梅拿登陸美職，兩人有機會交手。
