東網電視
更多新聞短片
C朗有望再次加盟英超球隊。(Getty Images)
「擴軍版」世冠盃將於6月中展開，根據《SPORTbible》爆料，C朗為咗出戰呢項大賽，打算同有份參賽嘅球隊簽1個月短期合約，其經理人團隊正在同車路士及曼城接觸，意味呢位40歲葡萄牙巨星有望再次加盟英超球隊。
國際足協為世冠盃球隊，6月初加開特別轉會窗，C朗同艾納斯嘅合約將於6月屆滿，雖然好大機會續約，但佢有新主意，打算簽新約之前，短暫轉投世冠盃球隊，因為呢項大賽今屆擴軍增加至32隊，並改為4年舉行1次，C朗希望球員生涯尾聲一嘗參加呢項大賽滋味。
消息人士指C朗想踢世冠盃，仲有另一個原因，佢轉戰沙特聯賽後，商業收入減少1,000萬至1,500萬歐元，想透過踢世冠盃提升商業收入。
與此同時，車路士及曼城睇中C朗嘅商業價值，願意向佢開出短期合約，有錢齊齊搵。事實上，曼城領隊哥迪奧拿4年前幾乎簽入C朗，但佢最終決定重返曼聯，由於射手艾寧夏蘭特上仗受傷長抖，簽入C朗做替工都係唔錯選擇。至於車路士一直欠缺正宗射手，簽入C朗正好可以解決問題。
