東網電視
更多新聞短片
阿里基(右)可能取代沙治奧干斯卡奧(中)，下季執教AC米蘭。(Getty Images)
AC米蘭上年12月底聘請沙治奧干斯卡奧執教，雖然呢位50歲葡萄牙名帥迅速協助球隊捧意超盃冠軍，但好景不常，成績每況愈下，根據《Football Italia》爆料，A米計劃今夏再次換帥，可能邀請阿里基回巢領軍。
AC米蘭上場意甲1比2不敵拿玻里後，現時僅排聯賽第9位，落後第4位博洛尼亞9分，要打入前4位奪取下屆歐聯入場券，形勢唔樂觀。加上沙治奧干斯卡奧性格火爆，曾同卡拿比亞公開衝突，導致呢位前隊長離隊，惹起公憤，球會管理層亦對干斯卡奧愈來愈不滿，好大機會提早1年同佢解約。
據悉AC米蘭將會聘請新體育總監，並由呢位「新大佬」負責遴選新教練，盛傳前祖雲達斯主帥阿里基最大機會接手執教。呢位57歲意大利名帥曾於2010至14年執教AC米蘭，協助「紅黑兵團」捧2010/11年球季意甲冠軍，佢上年5月被祖雲達斯解僱後，仍然未有着落，A米正好可以趁機招攬佢回巢。
