東網電視
更多新聞短片
阿諾特自由身離隊令利物浦球迷非常不滿。(Getty Images)
利物浦球星阿歷山大阿諾特，盛傳將喺夏天自由身加盟皇家馬德里，消息曝光後大批利迷震怒，有人焚燒阿諾特件波衫抗議，亦有大批球迷要求將佢雪藏，不過「紅軍」名宿艾德列治就表示，球迷如果要發火，只能怪利物浦管理層反應慢。
現年66歲嘅艾德列治表示：「如果阿諾特真係去皇馬，我會好心痛，但呢個係佢嘅人生，佢有自由選擇點樣去過。問題係利物浦2年前就應該同阿諾特續約，轉會就好似玩啤牌，邊個手牌靚就有叫價能力，2年前球會冇續約，到剩低1年你就被逼入牆角，依家搞成咁，要怪就只可以怪自己。」
艾德列治喺1987年至1989年效力利物浦，之後亦係轉會西甲加盟皇家蘇斯達，但艾德列治就話當時情況唔同：「我自細就係利迷，願意為球隊踢一世，不過當時領隊杜格利殊講明，魯殊同比士利會係正選前鋒，我基本上唔會有機會，所以我只能夠轉去西班牙。」
