東網電視
更多新聞短片
曼聯考慮出售加拿祖。(Getty Images)
拿玻里同車路士早前冬季轉會窗曾向曼聯求購阿歷真度加拿祖，最後交易告吹，據報今個夏天曼聯考慮再度出售該阿根廷小將，假如有球會出價達到5,000萬鎊(約5億港元)，曼聯就會放人。
英國傳媒報道，上個轉會窗加拿祖幾乎離隊，車路士同拿玻里都曾經出價，甚至連加拿祖都已經向主場球迷告別，不過曼聯當時唔想將球員賣畀英超對手，而拿玻里開4,000萬鎊轉會費又未到價，最終交易告吹，加拿祖留隊。
不過近期所見，加拿祖無論幾努力，始終無法適應領隊魯賓艾摩廉嘅343體系，上場對諾定咸森林更加踢到發晒脾氣，反而佢嘅前隊友安東尼艾蘭加呢場一腳射爆曼聯，比較之下加拿祖表現更差。
英國傳媒報道，曼聯今夏需要資金重建球隊，加拿祖再唔係非賣品，如果車路士及拿玻里願意出價5,000萬鎊，曼聯內部有人認為可以考慮。
