東網電視
更多新聞短片
費倫托利斯再為巴塞入波。(Getty Images)
氣勢如虹嘅巴塞隆拿，周四(3日)凌晨西盃4強次回合，作客1比0擊敗馬德里體育會，兩回合合計贏5比4晉級決賽，將會同皇家馬德里爭奪冠軍。巴塞今季喺西超盃決賽擊敗皇馬捧盃，西甲同西盃又係同皇馬激鬥，甚至歐聯亦有機會喺決賽會師，兩大宿敵打崩頭！
首回合踢成4比4，今場兩隊就穩陣得多，不過巴塞仍然喺27分鐘搵到缺口，代替羅拔利雲度夫斯基擔正嘅費倫托利斯，接應拉明耶馬直線單刀射入，巴塞就憑呢球贏波入決賽。巴塞同皇馬進行3冠爭逐，佢哋今季兩次交鋒，巴塞都大勝而回，嚟緊仲有西盃決賽同西甲次循環，加上可能出現嘅歐聯決賽對決，可能仲有2至3場「國家打吡」會上演。
對於有機會成為4冠王，巴塞教練費歷克賽後表示：「我哋可以有呢個夢想，但一定要保持專注，依家要盡快調整、恢復同訓練，準備下一場聯賽。未來幾個星期都唔會輕鬆，但我哋擁有一支好好嘅球隊，球迷可以覺得驕傲。」
