東網電視
更多新聞短片
保加利亞VAR爆出醜聞。
自從VAR系統出現後，爭議性嘅判決似乎未有減少，最近保加利亞頂級聯賽更爆出醜聞，有VAR房嘅技術人員，被影到喺工作期間拎出手機疑似下注，引起極大回響。
據報事發比賽係周四(3日)索菲亞中央陸軍1比0贏索菲亞火車頭嘅聯賽，比賽開始前直播鏡頭循例影下VAR房，除咗兩名正副VAR球證外，仲有一個負責選取影像嘅技術人員，佢唔為意鏡頭影住情況下，拎出手機疑似造訪一個博彩網站，幾秒後發覺自己被直播出街即緊急收埋。
雖然畫面無法判斷個技術人員有冇下注，或者下注涉及乜嘢項目，但就令球迷質疑VAR嘅公信力。保加利亞球證協會回應：「我哋關注呢件事並已採取相應措施，但要強調當事人係屬於鷹眼公司，同球證協會冇任何僱員關係。」
