東網電視
更多新聞短片
雲尼斯奧斯近2次操刀12碼都宴客。(Getty Images)
皇家馬德里喺西甲1比2不敵華倫西亞，爭標機會受到致命打擊，其中巴西前鋒雲尼斯奧斯祖利亞12碼宴客，繼上月歐聯對馬德里體育會後再次射失12碼，教練安察洛堤暗示考慮更換劊子手，而「小雲」更被踢爆射12碼前同華倫西亞門將輸賭落敗，但賽後未有「找數」。
統計顯示，皇馬今季一共有17個12碼，但只係成功射入12球，成功率只得7成，其中基利安麥巴比同雲尼斯奧斯各射失2次，祖迪比寧咸就宴客1次，係自13/14球季後皇馬單季射失最多12碼一季。隨住「小雲」連續2次操刀甩轆，安察洛堤賽後被問到下次會唔會由麥巴比處理，安帥就回應：「無論雲尼斯奧斯踢得好定差，佢都會集中自己。12碼人選我會再睇下點安排。」
今場救出「小雲」12碼嘅華倫西亞門將馬馬達舒維利賽後爆料：「我提出同雲尼斯奧斯輸賭，如果我救出佢嘅12碼，佢就畀50歐元我，佢當時話『好』，結果我贏咗，不過佢依家仍然未找數！」
