東網電視
更多新聞短片
「曼市打吡」曼聯主場迎戰曼城，雙方今季成績平平，「紅魔鬼」目前排喺聯賽下半版，「藍月亮」排喺第5位，宿敵碰頭加上為咗挽回面子，估計兩隊都唔會放軟手腳，預計戰況激烈。
「紅魔鬼」上周中作客以0比1不敵諾定咸森林，開賽初段已被對手攻破大門，其後傾力反擊都只係食白果。主帥艾摩廉相信會察覺球隊攻力不足問題，事關聯賽之今只攻入37球，一眾前鋒表現平平，前鋒海倫及約舒亞舒克斯各僅攻入3球，惟有倚賴隊長般奴費南迪斯擔當入球重任，今場面對曼城要解決攻力問題，一時三刻相信唔容易。
「藍月亮」上周中主場以2比0擊敗李斯特城，憑著馬莫殊及基亞利殊嘅入球輕鬆全取3分。首席中鋒艾寧夏蘭特受傷，相信主帥哥迪奥拿重用聯賽上陣8次已經取得5個入波嘅馬莫殊，加上基亞利殊打破聯賽16個月入球荒，相信有助重建信心。從雙方球員質素比較，始終曼城佔優，加上首循環被曼聯反勝2比1，相信一眾球員唔敢掉以輕心，估計今場有望反客為主，務求全取3分。
