東網電視
更多新聞短片
蘭斯達爾英超生涯波折重重。(Getty Images)
修咸頓喺周日(6日)成為今季英超首支篤定降班球隊，英格蘭門將蘭斯達爾感受特別深，事關今次已經係佢第3次經歷英超降班，餘下賽事唯一目標係贏1場波，避免成為英超史上最低分球隊。
修咸頓1比3輸畀熱刺後，31輪賽事只得10分，有機會打破07/08球季打比郡只得11分嘅史上最低分紀錄。蘭斯達爾賽後表示：「我哋今季表現唔差，知道降班係遲早嘅事，今日係傷感嘅一日，球員會學到好多嘢，我哋嚟緊希望盡量搶分，冇人想打破打比郡個紀錄。」
蘭斯達爾被指係「被詛咒之人」，事關佢之前已經跟般尼茅夫(2020年)、錫菲聯(2021年)降過班，今次係佢第3次經歷英超降班之痛，同賓科士打、菲臘斯睇齊。不過蘭斯達爾都唔係最「衰」嗰個，尼敦布歷克同靴達臣都試過5次英超降班，其中冰島球星靴達臣仲係跟5間唔同球會降班(水晶宮、溫布頓、葉士域治、查爾頓、樸茨茅夫)，真係前無古人！
另外，修咸頓降班後，宣布解僱領隊祖歷。祖歷去年12月上任，取代羅素馬田協助護級，結果失敗，祖歷在任僅107日落台，下任領隊人選是錫周三領隊丹尼羅爾。
