東網電視
更多新聞短片
班倫莊臣踏入新里程。(Getty Images)
熱刺上場聯賽3比1踢修咸頓落英冠，梅開二度嘅班倫莊臣踏入新里程，統計顯示佢今季英超入球已經達到雙位數，屬職業生涯首次，亦係加里夫巴利之後，第2位單季入球雙位數嘅熱刺威爾斯球員。
23歲嘅班倫莊臣2023年夏天由諾定咸森林加盟熱刺，首個球季僅入5球，今季表現有明顯進步，季初試過各項賽事連續6場入波，到上場對修咸頓攻入2球，今季至今攻入16球，英超累積11球，追平加里夫巴利2021年由皇馬外借回巢熱刺攻入11球紀錄，亦成為今季熱刺首席射手。
熱刺官網報道，班倫莊臣仲有好多地方有待改進，例如缺乏1對1過人能力，以及球隊失去球權時甚少回防，但佢喺門前演出獲得主帥普斯迪高路認可，佢話：「只要班倫上場，就會構成威脅，佢為球隊作出好大貢獻，除咗入波，佢仲幫球隊博得12碼。」不過補時博得嘅12碼由馬菲斯泰爾操刀射入，令班倫莊臣錯失上演帽子戲法機會，想「戴帽」就要等下次。
