準備新球季大展拳腳嘅阿士東維拉，周五(11日)發聲明證實阿根廷中場貝安迪亞膝部韌帶嚴重受傷，傳聞今季可能都冇得上陣。收到噩耗嘅維拉啟動緊急應變，據報佢哋正同加拉塔沙雷斟介，希望收購意大利球星尼高路辛尼奧路救亡。<br/><br/>26歲嘅貝安迪亞近日喺操練受傷，維拉證實呢位阿根廷攻擊中場膝部韌帶重創，目標正尋求專家診斷，仍未決定治療方案，但消息指佢可能會缺席整個23/24球季。阿士東維拉英超首戰，會喺周日(13日)凌晨作客紐卡素。<br/><br/>轉會權威Fabrizio Romano報道，維拉希望收購尼高路辛尼奧路代替，呢位意大利球星今年1月先由羅馬轉投加拉塔沙雷，上陣10場聯賽入5球表現出色，維拉新任總監蒙奇喺效力羅馬期間，對尼高路辛尼奧路非常熟悉，所以正全力促成交易，據報尼高路辛尼奧路合約中有2,600萬鎊(約2.6億港元)買斷條款。