周三(27日)凌晨意甲，祖雲達斯主場以1比0擊敗萊切，但比賽末段出現爭議性一幕，萊切中場穆罕默德卡巴突破入禁區之後，遭對手拉跌，但球證基亞唔止冇吹罰12碼，更加指穆罕默德卡巴「插水」，向佢出示黃牌，兩黃變一紅被逐。<br/><br/>祖雲達斯上仗2比4不敵薩斯索羅，今仗表現亦只屬一般，踢到57分鐘，先至由米利克射入全場唯一入球。戰至補時3分鐘，祖記更幾乎失守，萊切中場穆罕默德卡巴扭過回防嘅費達歷高基艾沙，殺入禁區，基艾沙出手拉跌佢，但球證基亞卻認為穆罕默德卡巴「插水」博12碼，向佢出示黃牌，後備上陣嘅卡巴本身已有1張黃牌在身，因而因兩黃變一紅被趕出場，引起萊切球員強烈不滿，包圍球證基亞理論，但都無法改變結果，祖雲達斯喺一片爭議聲中全取3分。<br/><br/>此外，祖雲達斯今仗透過角球攻勢，輾轉由米利克射入，但其實係祖記中場拉比奧特掂到個波後出底線，唔應該判角球，而且入波前，祖記中堅魯加尼疑似犯手球，球證基亞都冇表示，可見呢場波非常「黑暗」。