三冠大賽首關，途程1600米一級賽董事盃將於今個月21號舉行，馬會今日率先公布報名馬匹名單，由於馬王「金鎗六十」早前受傷未能參戰，而「浪漫勇士」亦一早講明唔會參與此場賽事，故此今屆冇咗呢兩匹G1佳駟在陣，自然失色不少。至於早前角逐華商會盃落敗的前香港一哩錦標冠軍「加州星球」則有報名，聯同廐侶「美麗同享」一齊出擊。<br/><br/>至於今屆董事盃焦點，應該落喺姚本輝馬房嘅「遨遊氣泡」身上，呢匹上季打吡冠軍剛戰於香港一哩錦標不敵「金鎗六十」跑第2名，今回再次卜定麥道朗掛帥，且看能否首奪一級賽。而早前因傷未有參與國際賽的長途好手「將王」，則選擇於呢場1600米G1復出。其餘報名馬匹包括「永遠美麗」、「佳運財」、「健康愉快」及「直線力山」。