東網電視
更多新聞短片
呂健威尋晚連中三元，威風八面。
如果係去年尾問大家邊位喺今季冠軍練馬師，相信九成嘅人都係答伍鵬志，事關當時佢已經拋離對手好遠，氣勢亦非常之勁。不過，經過龍年呢兩次賽事，伍鵬志固然仲係大熱門，但先有蔡約翰起孖，然後尋晚輪到呂健威憑3隻冷門「上浦精選」、「迎樂」同「金發盛世」中三元，練馬師榜嘅形勢已經出現變化，伍鵬志仍以47W領先，但威哥已經有35場，落後12W，去到一個唔係冇得追嘅距離，究竟會唔會出現龜兔賽跑嘅情況？真係季尾先知。
不過，目前嘅情況就真係話畀大家知，練馬師嘅攻勢真係一浸浸，極難長期維持高水平，雖然呂健威季初氣勢都好勁，但去到11月突然停咗落嚟，直到最近又開始嚟料，而伍鵬志其實好犀利，即使最近一個月左右只得3W，但總算有啲進帳，因為之前帶離得遠，目前都有優勢。所以依家冠軍練馬師之爭嘅關鍵，首先就係睇蔡約翰、呂健威喺呢段時間有冇能力加強攻勢再追近啲，之後再睇伍鵬志仲有冇子彈喺手，如果嚟多一波連贏6、7日嘅話，咁今季冠軍練馬師之爭，就會提早結束。
