南圍馬迷有眼福　名戰古城細場沙地公開操練

英國南圍馬場雖然歷來跑沙地賽事為主，鮮有重要一級賽舉行，當然好難有機會見到頂流名駒。不過本月20日，南圍附近居住嘅馬迷有機會目睹應屆3料G1盟主「名戰古城」嘅風彩，不過只係「名戰古城」專誠到此操練，為進軍育馬者盃經典大賽，初次接觸本土沙地賽道。

南圍馬場行政總裁Mark Clayton，證實古摩亞樂意開放「名戰古城」嘅操練畀馬迷欣賞，細節以至名額方面雖然未公布，但初步會喺限定時間透過官網登記，而Mark Clayton表示將會盡量滿足當地馬迷要求。

南圍賽道目前使用Tepeta物料，與美國育馬者盃經典大賽跑泥地當然有一定分別，但岳伯仁認同讓「名戰古城」先行熟習頪似場地，也是重要經歷。

至於「名戰古城」何解放棄出戰歐洲最高榮譽嘅法國凱旋門大賽，而鎖定跑育馬者盃，而且並非跑有把握之草地大賽，反而出師育馬者盃經典大賽？站在古摩亞立場，當然希望炮製出泥草俱能之全材種馬，以「名戰古城」今季先後拿下英國打吡、日蝕錦標及國際錦標，已一再證明草地性能超卓，但呢匹馬出自美國三冠馬王「正義」，若然喺育馬者盃一戰功成，長線配種價值將會係天文數字。

此外，岳伯仁贏得嘅世界各地大賽榮譽無數，亦曾贏過兩屆凱旋門大賽，甚至育馬者盃嘅草地獎項方面，對佢嚟講都冇乜難度，但喺佢嘅CV之中，偏偏冇育馬者盃最高榮譽嘅經典大賽獎座，所以今次把握機會，「名戰古城」一於向泥地挑機。