東網電視
更多新聞短片
「紫荊拼搏」上場初出有意監生吞，四班只屬短暫過客。
1/2
艾兆禮剛響周三晚夜賽，終於憑「競馬一心」爆冷重響勝鼓，打破近期小悶局，自然期望可以食住度勢，繼續數胡，畢竟本身都係歐洲頂流騎師，今季幸運之神唔眷顧，31場屈居做阿二，目前16W嘅成績，睇怕當事人都唔會滿意。
雖然今期賽事，潘頓、布文再加埋3位客串高手，澳洲幫人強馬壯，難免主宰大局，但以艾兆禮嘅級數，只要有好馬在手，亦絕對有殺出重圍嘅能力，以佢呢期賽事，上場初出1400米已經心存大欲嘅「紫荊拼搏」，絕對係戇豆先生最重要嘅數胡籌碼。
「紫荊」系馬主陳國泰，自從艾兆禮來港發展，都一直支持佢，而馬主似乎與意大利騎師好投緣，除咗同戴圖理係死黨外，艾兆禮來港前响英國亦有為佢效力，所以嚟到香港，又點會唔撐呢位老友。
「紫荊拼搏」能夠初出1400米就搏殺，只係輸畀路程專家「安泰」，本身呢個第二，亦已拋甩群駒，實力肯定四班可留，相信呢匹餐士馬，艾兆禮應該可以不費半力，恃質輕易補中執多場。
艾兆禮早於英國，已披上「紫荊」系綵衣為陳國泰效力。
