爆B女放電冧靚仔　王祖藍呷醋慘呻被冷落

藝人王祖藍、郭晉安在將軍澳電視城接受《今日VIP》訪問，「新手爸爸」祖藍近期忙於湊B，他表示要趁機向郭晉安（安仔）取經：「依家係最幸福嘅時間，有外父、外母、陪月同工人姐姐照顧，阿男（老婆李亞男）就辛苦啲，要餵奶、換片，又要等傷口埋口，媽媽真係好偉大。」他自爆對住囡囡時戰戰兢兢，連餵奶都驚，亦未敢幫為BB換尿片：「始終係新手，好多嘢都驚，掃風都驚會箍到佢窒息。」

投訴囡囡冇本心

祖藍大爆囡囡見到靚仔會放電甜笑，但對爸爸就沒有反應，只顧睡覺，相當乞人憎，他笑說：「前幾日鄰居Jason（陳智燊）兩公婆嚟我屋企，Jason一抱佢、佢就放電，仲眼甘甘咁笑咗三吓，但對住我就瞓覺，我要望到佢笑，好似等孔雀開屏咁，冇本心，我梗係呷醋啦！」

提及新年將至，祖藍笑謂今年終於可以交換「禮物」：「之前有出冇入，今年就可以交換禮物（利是）。」問可會帶囡囡亮相？他說：「大家拭目以待，拜年、百日宴大家都一定會見到。」