林峯事隔兩年再開騷　預告爆衫又爆褲

藝人林峯相隔兩年再踏演唱會舞台，將於5月11日假澳門威尼斯人金光綜藝館挑戰四面台舉行一場《Heart Attack林峯演唱會》。日前在個唱宣傳活動上，重溫個唱的精彩花絮片段，片中半裸的他擁有六舊腹肌完美身材，主辦單位英皇娛樂特送上一籃番薯祝他收身成果更進一步，而現時身材甚fit的他，自言未達最佳狀態，頻說：「盡力盡力，塊面就ok。」

食蕉頂肚

林峯的澳門個唱門票，將於4月4日公開發售，不過他卻聞：「話網上已經有飛買，所以想提醒買飛嘅朋友要小心啲。」又說在忙籌備個唱期間，又要返內地趕拍《尋秦記》電影版，加大了Keep Fit難度，他無奈說：「我係易肥易瘦體質，所以要小心控制食量，腹肌係有記憶嘅，依家都有六舊，但除衫爭少少，咁開工要energy，但又要冇啖好食。（食蕉頂肚？）有蕉食已經唔錯，蕉有糖分其實唔食得，都係食烚雞肉，希望內地有走地雞。」

問到今次澳門場可會加料？他預告：「會着衫，爆褲囉，呢樣要睇服裝師決定，老實講練下身易過練上身，上身好難收，練對腳就推重嘢就得，好多跳舞部分，為加強體能，返內地拍戲時會帶埋健身教練操，運器材就難啲，睇吓拍戲附近有冇健身中心。」

唔提女友

問屆時屢傳婚訊的內地模特兒女友張馨月可會到澳門捧場？他指家人應會到場，但不願提女友：「都話咗以後唔講另一半嘅嘢，唔好要我咁煩啦。（結婚都唔講？）呢啲順其自然，唔使分享，多謝關心。」完成澳門演唱會後，6月將在內地舉行三站演唱會，現計劃明年再舉行大型巡唱，他說：「舊年一路拍影視嘅作品，年幾冇喺舞台上，一路想以歌手身份喺舞台上報答支持我咁多年嘅fans，想喺廣東省以外嘅地區，直接帶個騷畀內地唔同城市嘅fans睇。」

問到回歸無綫拍《使徒行者3》劇集，可會跟隸屬無綫的星夢唱片公司合作？他指：「有份唱主演嘅劇集主題曲都會合作，不過我同無綫合作係視乎劇本同角色有冇得發掘落去，我只簽咗古天樂一間經理人公司。」