8月生得　高齡產婦華原朋美挺大肚搵奶粉錢

44歲日本女歌手華原朋美在踏入令和新年代後，搶閘宣布懷孕6個月兼做未婚高齡產婦，預產期是今年8月，好快成為令和媽媽。不過據知情者透露，BB的父親是在外資企業工作的圈外人，更是一名有婦之夫，華原其實是第三者。

雖然有負面報道，目前懷6個月身孕的華原，昨日仍按照計劃演出在栃木縣舉行的《岩船山Cliff Stage戶外演唱會》搵奶粉錢，同場演出還有小柳由紀、女團Chuning Candy等。華原身穿紅色孕婦裝現身，觀眾隨即歡呼聲不絕，有觀眾更大聲恭喜她。華原在台上說：「今日又特別又快樂，開心的事自己有了BB，可以同肚內的BB一齊。」面露幸福笑容。她又笑住說自己最近肚子急劇變大，BB一定好健康，她又笑自己想得太快，未生BB已經想打電話搵幼稚園，見到童裝店睇童裝衫，仲揀衫揀得好開心，覺得未來充滿快樂。而當晚華原演唱《I　BELIEVE》等6首歌。在後台，不少人爭相同她合照，包括有份演出的女團Chuning Candy。而華原演出這場騷後會全面休息安胎，若有演出邀請就視乎健康而定。