何雁詩憶新冠疑雲與Fred分房瞓：忍唔住喊

歌手何雁詩（Stephanie）上周因發燒及喉嚨痛而鬧出疑似確診驚魂，最後報告為陰性。事隔一星期Stephanie首日復工出席電台訪問，她稱一直留在家中未有出外。問到不用自我隔離14天？她謂：「有問過醫生，佢話我冇外遊亦冇緊密接觸人士，所以唔需要隔離，但我同Fred（鄭俊弘）都覺得等埋報告結果出嚟，知道係陰性嗰晚佢先敢出席《法政先鋒IV》結局嘅活動。」<br/><br/>講到等待出報告心情？她坦言:「係好差，因唔係擔心自己，係擔心連累身邊人，同年老幼童。」有冇驚到喊？她承認有，因當晚她在房隔離，Fred做廳長：「有喊，嗰晚我同Fred 講我瞓啦，佢就喺房外同我揮手，我就忍唔住喊出嚟，佢遠遠叫我唔使擔心，冇事嘅。」<br/><br/>講到收到報告終於放下心頭大石，Stephanie形容當時是開心到飛跳上Fred身上。問到現可加強防疫？她稱當然有，因自己病有可能影響到其他人，尤其她去過醫院見到醫護人員穿上保護衣同面罩，是很辛苦，大家沒事都應留在家中，不要再加重醫護人員負擔。