【等唔切】林熹瞳年紀唔細 擺完酒即造人

2020年10月01日 14:47
東網電視
更多新聞短片
好Sweet呀!
藝人林熹瞳早前因為新冠肺炎影響,令婚期一改再改,今日終於喺九龍區教堂行禮,仲要適逢係中秋節,人月兩團圓,但鑑於「禁聚令」關係,觀禮親友只可以20人,故唔少親友都要喺門口等候入內,同一對新人影相。
身穿低胸婚紗嘅林熹瞳,顯得份外高貴,她透露老公姓何,今早出門儀式進展順利:「尋晚家姐幫我上頭,仲有三個姊妹同父母陪住,由酒店嚟教堂都有少少迷路,搞到有少少緊張。(斟茶嗰陣有冇喊?)完全冇喊,我係一個開心新娘,全程係咁笑,但一行入教堂,即變喊包,覺得好失禮,明明今朝情緒仲好High。(尋晚有冇瞓唔着?)我預備咗1/4粒安眠藥,所以瞓得好好。」
問到老公有冇講咩愛的宣言?佢笑言冇聽:「我用眼、用身去感受,希望兩個人長長久久,白頭到老。」講到現時「禁聚令」關係,令婚禮可以有廿個人,但聽日將會放寬,林熹瞳坦言覺得打擊好大:「呢個係最令人震撼,好大打擊,放寬一半人,咁呢個場坐到200人,即係坐到100人,依家變咗廿個廿個咁換人入去,其他人就要喺酒店睇社交網直播,睇完就嚟影相,真係好對唔住佢哋,好辛苦佢哋。」
即將喺月尾擺酒嘅佢,問到佢幾時實行造人大計?佢笑言:「好趕,因為婚期延期,所以我趕住造人,因為年紀都唔細,好想有小朋友,在加上我係教徒。(生幾多個?)一個起,兩個止。(可以今晚開工?)係呀,但想擺埋酒先。」佢又謂現時接咗編劇工作,要明年年中先完成,屆時邊造人邊工作,婚後亦唔會抗拒幕前工作。
----------------------------------------
「繽FUN星網」誠招各類有趣短片!
家有可愛貓狗,想同更多嘅人分享?
有橋有料,素人想一片成名?
立即寄片嚟: bunfun@on.cc