「荒唐鏡」復活!吳啟華孖鄧特希炮製3大作搶灘

2020年11月08日 00:02
東網電視
更多新聞短片
吳啟華咁有經驗,實冇問題啦!
「師奶殺手」吳啟華曾演出不少經典角色,令他儲足實力轉型製作人,他聯同金牌監製鄧特希組公司,邀老闆巨額合資連開3部作品,向「視影大亨」之路進發,頭炮演其經典作賤嘴狀師「荒唐鏡」!
56歲吳啟華入行37年,演藝工作經驗豐富,雖然創意多多,但受演員身份之限,在發揮上有不少掣肘,所以他有轉型做製作人的想法。啟華有鑑近年在內地發展時,遇上不少有潛力的演員和演藝界投資者,因而造就他伺機由演員「升呢」做幕後玩家,跟既是金牌監製又是老友的鄧特希合組製作公司,並計劃簽藝人和斥巨資開院線電影、網絡電影和劇集,實行向「影視大亨」之路進發。
啟華與鄧特希的「傑作」,頭炮當然離不開2人的經典,合力打造清裝版和現代版的《皇庭》作品!當年啟華在電影《九品芝麻官之白面包青天》中陰險賤嘴狀師「荒唐鏡」,以及《壹號皇庭V》中令人懷念的高級督察「Alex」角色,他與劇中女友蔡少芬未能在一起令劇迷感遺憾,徇眾要求下,鄧特希將重塑啟華以及一眾《皇庭》班底的緣分之路,兩者集中兩個年代的狀師和律師情節,開正鄧氏擅長的律政戲軌。
身在內地的啟華回覆稱:「想學吓做製作人,手頭上有好多好嘅資源,要好好利用,依家等緊鄧生劇本,第一套希望開《廣東四大狀王》,我會做番『荒唐鏡』,等疫情過咗,預計農曆年後開工!(其他演員?)有啲未講得,但曾志偉話一定會撐我!(斥巨資開戲做影視大亨?)其實有好劇本、好班底,內地會有好多人想投資,好似《皇庭VI》都係大家感興趣嘅戲,個戲要喺香港取景,希望冇社會運動問題,就順利開工。」而負責故事及監製的鄧特希則表示:「我哋係有一連串製作,做緊好多資料搜集,啟華今次好認真,務求所有嘢都好精緻,製作層面上係好新鮮嘅,暫定會一連開三套,演員方面相信令觀眾有驚喜!」
蔡少芬得聞啟華有大搞作,坦言要力撐:「好開心聽到佢有呢個計劃,希望佢成功!(合作新戲再續前緣?)搵我先講啦,哈…我當然想同好嘅班底合作!」而同樣是《皇庭》班底的陶大宇,他稱:「我哋《皇庭》WhatsApp群組中,啟華叫幫手,如果可以重聚當然期待!」
----------------------------------------
「繽FUN星網」誠招各類有趣短片!
家有可愛貓狗,想同更多嘅人分享?
有橋有料,素人想一片成名?
立即寄片嚟: bunfun@on.cc