盤點5名最靚仔男主播 有一位似吳彥祖朱敏瀚混合體

2021年05月19日 10:05
東網電視
更多新聞短片
提起新聞主播當然就諗係靚女啦!不過其實男主播都唔差架,其中有5位男主播仲達到男神級別,顏值絕對唔會輸畀明星,無綫新聞主播彭建樺同前有線新聞主播黃浩賢就已經係公認靚仔喇,但最近有一位新男神彈起,靚仔程度係朱敏瀚同吳彥祖嘅混合體!今日就介紹下呢位名叫徐俊逸嘅靚仔男主播,同埋盤點吓其他4位男神主播!
彭建樺
無綫新聞主播彭建樺外形黑黑實實,充滿陽光氣息,無論笑定唔笑都好靚仔,絕對唔輸畀一線小生,佢唔單止報道新聞,仲有主持時事節目《探古尋源》,最勁嘅係佢紅到有粉絲專頁,唔少網民Cap低佢報新聞嘅圖片放上社交網一齊交流。
黃浩賢
前有線主播黃浩賢 (Edwin) 最近消失於幕前好耐,唔少粉絲都覺得好失望,好彩佢都有更新社交網慰藉一班粉絲心靈,Edwin出名青靚白淨又嫩口,年齡只得26歲,大把前途,唔愁冇出路,有網友喺佢社交網留言叫佢參加《全民造星》。
容家耀
無綫新聞主播容家耀2018年畢業於香港城市大學媒體與傳播系,今年只得25歲,外表眉濃、鼻挺再加唇紅齒白,絕對稱得上係小鮮肉,佢通常為無綫新聞台報道深宵新聞及無綫財經新聞,有時又會主持《香港早晨》,真係日夜都可以見到佢。
何駿彥
無綫新聞主播何駿彥(Daniel Ho) 外表官仔骨骨,戴住副眼鏡斯斯文文,笑起上嚟仲有少少怕醜,真係搞到啲姐姐囉囉攣,佢通常報道《香港早晨》,晨早打開部電視見到佢心情都會好啲,早餐都食得開心啲,而佢都好識做公開自己嘅社交網,定時上載新相同粉絲打招呼,網友都留言話「型到要檢舉佢」。
徐俊逸
無綫新聞主播徐俊逸最近極速彈起,成為網民嘅新寵,外貌似足無綫小生朱敏瀚同男神吳彥祖混合體嘅佢,鼻高、唇薄,雙眼烔烔有神,難怪令人印象深刻!而佢報道新聞時,就表現出佢專業嘅一面,字正腔圓又嚴肅,依家佢通常會出現喺深宵新聞報道,不過佢就冇公開社交網,搞到一班粉絲只能Cap佢新聞圖「取暖」。