《聲夢傳奇》外圍賽！林智樂激似陳肇始　炎明熹變野口

無綫歌唱比賽《聲夢傳奇》令一班參賽者人氣急升，成為網民最鍾意嘅討論話題，好似林智樂（Felix），佢對單眼皮加埋副眼鏡個look，硬係好似一個人，左諗右諗，終於醒起，原來Felix仔好似食物及衞生局局長陳肇始喎，雖然一個係17歲嘅後生仔，一個係63歲嘅女高官，又唔同姓氏，應該冇三分親，但唔知點解又真係好似有「血緣」咁似樣！

至於另一位參賽者，同15歲詹天文（Windy）傳緋聞嘅23歲冼靖峰（Archie）咁，畀人話佢同韓星朴寶劍撞面撞到嘭嘭聲，睇番Archie啲相，除咗髮型，同埋佢塊面比朴寶劍方啲外，啲眼、耳、口、鼻，真係好似倒模出嚟一面喎，不過佢當然冇「朴男神」咁靚仔啦！

講完兩個男仔，就到女學員啦，有網民話16歲嘅大熱冠軍人選炎明熹（GiGi）唱歌似「宇宙漿」G.E.M.，但佢木無表情時個樣竟然同動畫《櫻桃小丸子》中嘅野口同學撞晒，話佢哋個髮型同鼻形近乎一模一樣，提議如果再開拍《櫻》真人版，不妨考慮畀個機會GiGi試吓鏡！