「東涌羅浩楷」火速殺入《愛．回家》　網友提議扮菲傭姐姐

有「東涌羅浩楷」之稱嘅利愛安（Kirsten）因參加港姐首輪面試而騎呢上位，不但簽約無綫，近日更被爆已迅速殺入劇組，獲安排拍人氣處境劇《愛．回家之開心速遞》！事緣日前無綫藝人黃建東於社交網上載與Kirsten及哥哥嘅合照，留言指歡迎加入大家庭，又大讚佢有初戀感覺，並標籤上「開心速遞」字眼。

雖然事後黃建東刪去有關標籤，不過劇集監製林建祥就承認Kirsten加入，並爆出港姐冠軍謝嘉怡亦將會加盟。網友即笑指希望有菲律賓血統嘅Kirsten，可與劇中扮菲傭嘅姜麗文鬥戲。

而黃建東接受東網訪問時，表示並非與Kirsten同場拍《愛》，只係當日喺化妝間偶遇對方時趁機合照，並在傾談過程中才得知對方正為《愛》開工，佢大讚Kirsten：「我有睇佢面試嗰啲片，覺得呢個女仔好sweet、好可愛、清純，令我諗起初入行嘅自己，佢簡直係『國民甜心』，如果將來有機會都好想同佢合作。」