葛斯齊又發功！踢爆蔡依林扮做善事：做戲也不做全套

台灣「資深狗仔」葛斯齊早前連環爆料，引起圈中連場「腥風血雨」，除首當其衝嘅大S前夫汪小菲外，牽涉嘅明星亦愈嚟愈多，繼林俊傑、鹿晗、迪麗熱巴後，台灣天后蔡依林突然中箭，成為新一波嘅爆料對象！日前葛斯齊再開直播，踢爆出名有愛心、經常定期做公益活動嘅蔡依林其實係假慈善，直指佢「做愛心只做一半」，葛斯齊表示曾收到消息指蔡依林在台灣醫院探望病童，當時佢立即趕到但發現蔡依林根本未見影，約半個鐘後先見到戴住頭飾嘅蔡依林姍姍來遲，喺工作人員陪同之下出現，仲完全冇望向佢嗰邊，疑似一早知有記者偷拍要扮唔知情，對此葛斯齊狠批：「做戲也不做全套。」