吳浩康家暴疑雲　郭思琳嬲爆晒瘀傷照

藝人吳浩康（Deep）於2022與太太郭思琳奉子成婚，同年9月誕下兒子「撑撑」吳尚恩，近年已修心養性的他，為搵錢養家更不惜做地盤，更對老婆郭思琳百般呵護，上月兩公婆撇低B仔到泰國布吉度假過二人世界，非常恩愛。

不過郭思琳日前突然於社交網晒出手腕瘀傷照片，嬲爆表示：「紀錄一下，呢兩年半不斷重複提醒，然後又係繼續ignore，無限輪迴，最後終於忍無可忍嬲到要打嘢發洩。我知整傷自己都無補於事，但我真係好嬲，除咗大嗌同打嘢發洩，我真係唔知仲可以點做…為咗我個仔同娜姐（指愛犬），我已經唔介意做衰人。」由於她文中未有指名道姓，令網民聯想到她是指老公吳浩康，引來家暴疑雲！但是她亦有為老公澄清，Hashtag指「我一直都唔係講緊我老公」、「唔好又屈我講緊佢然後網上公審我」、「如果你哋唔知人哋經歷緊啲咩，建議你哋收聲」。