SIS樂印姊妹斥資6位數 出歌紀念出道10周年
2024年07月13日 09:01
東網電視
更多新聞短片
![](/hk/bkn/cnt/entertainment/20240713/photo/bkn-20240713090143706-0713_00862_001_01p.jpg?20240713090803)
唱作組合SIS樂印姊妹在樂壇「消失」3年後,再度合體推出新歌《十年過去》。日前家姐樂樺(駱胤樺)及妹妹烙印(駱胤鳴)接受專訪,烙印對於成為「樂壇失蹤人口」,她笑謂:「其實冇失蹤,我自己都有推出新歌,只係依家冇唱片公司又冇做幕前,所以冇乜宣傳,加上疫情期間乜都做唔到,所以啲人以為我哋消失咗啫。」而樂樺則從事無伴奏合唱工作坊的工作,擔任導師教小朋友唱歌。
今次姊妹檔推出新作,烙印多謝樂樺斥資6數字,希望新歌陸續有來。談及《十》是紀念出道10周年,烙印大叫:「覺得自己老啦,好在我哋好細個入行。(冇合體3年,歌迷冇有流失?)又冇喎,雖然有啲Fans移咗民,有啲又離開咗呢個世界,但有啲就成為朋友,互相見證彼此嘅成長,早前先有位Fans話自己搬出嚟住,地方唔係咁大,所以問我可唔可以收留番幫我哋做嗰啲燈牌,我都話好,不過如果將我哋有活動時,叫佢提我帶番出嚟畀佢哋用,其實我都好開心,我哋3年冇搞活動,都冇當燈牌係垃圾丟咗佢。」
至於可會舉行10周年音樂會?兩姊妹謂曾想過故地重遊,可惜:「我哋第一次開騷喺九展,但九展都就嚟拆,又試過喺HMV開騷,不過呢間唱片舖亦執埋,或者我哋搞網上音樂會,如果想聚吓就搞見面會啦。」
問到姊妹近況?烙印表示現時從事Marketing及人妻的工作,至於何時當媽媽?結婚3年、33歲的她笑說:「其實我仲係BB嚟架,我都要人照顧,咁點照顧小朋友呢,不過我養咗3隻貓,當佢哋係仔女先啦,暫時未諗生BB問題。」已有穩定男友的樂樺則謂未心急嫁人,因為妹妹結婚時,連媽咪都覺得嫁女是令人很攰的「大工程」。
化妝:曾花/Fa Tsang Jennifer _t_workshop
場地提供:Kid's Circus Playhouse