東網電視
更多新聞短片
台灣女星徐熙娣（小S）同老公許雅鈞所生嘅3個寶貝女都係半隻腳踩入娛樂圈，當中以二女兒許韶恩（Lily）發展最理想，已經接廣告代言嘅佢，日前其廣告登上內地重慶一處購物中心外牆，點知被網友激烈炮轟，原來係因為佢去年一句「因為英文是母語」引發爭議，尋日（23日）品牌官方發出聲明，針對同Lily合作引發輿論風波一事致歉，同時宣布已終止雙方一切合作。
小S二女Lily深受品牌喜愛，已經有好多job。
Lily盡得媽咪真傳，好有星味。
早前佢就有多個廣告上架，點知一高調就出事。
熱衷經營社群嘅Lily，去年被網友提問點解佢講英文居多？佢發文解釋：「因為英文是母語，在學校、家裏、跟朋友聊天也是說英文，所以習慣以英文溝通。」後續風波延伸至今，更令佢痛失廣告代言。品牌本身宣稱撤下廣告係因為雙方合作到期，若後續有持續推廣亦重新將廣告上架，但尋日官方再發表聲明：「AIVEI品牌與許韶恩女士合作相關事宜引發輿論風風波，對此我們深表歉意，品牌已終止與許韶恩女士的一切合作。」極速斬纜，成為Lily入行重大挫折。
網友搵出佢去年表示「因為英文是母語」嘅爭議。
之後佢嘅廣告就急急被下架。
品牌依家更同佢終止合約，代言都冇埋…
