李幸倪孖馮允謙作曲壓力大 晚晚發夢考試:真係好驚
2024年07月24日 20:01
東網電視
更多新聞短片
![](/hk/bkn/cnt/entertainment/20240724/photo/bkn-20240724200113811-0724_00862_001_01p.jpg?20240724200113)
Gin Lee(李幸倪)近日推出全新歌曲《新牌仔》,今次她找來好友馮允謙(Jay Fung)等一齊作曲。歌曲講述「成長」,原來這個主題她一直埋藏在心底多年:「記得讀大學嘅時候,有一日我個同班同學同我分享佢屋企嘅嘢,話點解佢爸爸會係咁?我就突然間有一個諗法,同佢講:『其實你爸爸都係第一次做爸爸,可能有好多嘢佢都係學緊,你唔好怪佢啦。』」她指自己小時候深信大人應該甚麼都會,長大後才明白並非如此﹕「人生就係要不停學習,冇人永遠一百分。人生去到唔同階段,每個階段做嘅每個選擇,當時可能會令到你不知所措、會令到你覺得好難嘅一啲新嘅課題,但你要去學。」
她又謂自己與Jay Fung認識多年,閒聊間也會提到寫歌,但一直未有行動,直到今年二人合作舉辦音樂會,才速成其事﹕「我哋原先寫咗另一首歌,寫完之後大家覺得好似仲有啲精力,同埋仲有好多諗法,仲可以去創作另外一首歌,跟住我就成個故事講咗一次,大家好有感覺,佢哋都覺得呢個題材有趣,《新牌仔》就喺咁嘅情況下誕生。」
今次MV方面,Gin找來導演麥曦茵幫手,希望透過女性的敏感度,用她的方法將感受呈現出來。籌備拍攝前期的工作,Gin發送了很多audio note給麥導,將自己由出生到現在每個重要時刻都跟對方說了一遍,更打趣形容「佢好似認識咗我一生」,期間更講到爆喊,自己也始料所不及呢。