政Whats噏：蔡淑嫻57歲生日正日　升做創科局常秘

創新及科技局前常任秘書長卓永興喺今年4月開始退休前休假，政圈一直盛傳創新科技署署長蔡淑嫻將會接任。政府今日(23日)正式公布，蔡將會喺下周二(30日)接任創科局常秘，翻查資料，當日正正係蔡嘅57歲生日，睇嚟今次升職係一份唔錯嘅生日禮物嘞！

卓永興仲未正式退休前，政圈已廣泛流傳，蔡將會接任常秘一職，因為創科呢樣嘢太新，唔係個個政務官都識處理，做生不如做熟，蔡因而受惠。

翻查資料，蔡係1962年7月30日生日，本月30日出任創科局常秘之日，正正係佢57歲嘅生日。蔡喺1986年10月加入政務職系，2009年9月出任保險業監理專員，2015年8月起出任創新科技署署長。

此外，政府亦公布，運輸及房屋局副秘書長(運輸)潘婷婷，會同喺本月30日接任創新科技署署長。