東網電視
更多新聞短片
黃大仙區議會大鬧民政事務總署失職同僭越區議會職權。(設計圖片)
因應武漢肺炎來勢洶洶，政府日前宣布除咗提供緊急同必須公共服務嘅人員外，其他公務員下周一(2月3日)前都能在家工作，就連今日(29日)黃大仙區議會開緊急會議傾防疫措施，因民政事務處都唔辦公，冇秘書列席會議，而要取消個會。區議會大鬧民政事務總署失職同僭越區議會職權，又批評係總署將政治凌駕抗疫，仲話考慮動議削減民政事務局局長劉江華同民政總署職員嘅人工添！
黃大仙區議會本來召開緊急會議，點知變咗開記者會。該區議會主席許錦成話朝早就接到民政事務總署副署長王秀慧嘅來電，許引述王稱因疫情嚴重，不宜聚集人群，民政處亦唔會辦公，所以無秘書可以列席會議，於是要取消個會。
許批評民政總署好荒謬，指出面公司都唔會因秘書缺席而唔開會，加上今次議程會申請加碼撥款80萬嚟買口罩同洗手液派畀居民，但政府無人處理，只會延遲實施區內嘅防疫措施，唔理居民死活。
由於民政處無前線職員負責傳媒登記同接待，搞到要區議員開門招呼兼手寫會議文件，反觀喺同一棟大樓嘅民政諮詢中心就照常運作，許直斥民政總署將諮詢服務睇得比傾防疫措施嘅緊急大會重要，又稱已約好教育局、食環署、康文署，領展同港鐵等代表開會，但因會議取消而全部唔嚟，質疑喺抗疫嘅關鍵時刻，民政總署點可以因無人辦公就取消會議，批評對方失職同僭越區議會職權，睇怕區議會嚟緊要成立獨立秘書處添！
然而北區區議會今日亦就討論肺炎疫情開緊急會議，民政處同衞生署都有派員列席。一眾黃大仙區議員就話唔公平，質疑民政總署因要打壓區議會嘅政治背景，將政治凌駕抗疫，佢哋仲話考慮動議削減民政事務局局長劉江華同民政總署職員嘅人工，「既然為咗抗疫唔嚟開會，不如為咗抗疫減人工，攞筆錢嚟買口罩同洗手液啦！」
另外，葵青區議會主席單仲偕今日亦接到民政總署通知，取消聽日(30日)傾疫情嘅緊急會議，理由都係無人辦公，但單認為民政總署無權取消，會嘗試喺無秘書處嘅情況下開會。
民政事務總署回覆話，為配合政府控制疫情的有關安排，基於公眾健康同安全理由，秘書處未能出席黃大仙區議會特別會議，已向區議會解釋未能出席會議嘅原因，並建議可以傳閲文件方式處理有關事宜。
至於署方有派人出席北區區議會特別會議，總署解釋該會議係針對暉明邨唔再做隔離前線醫務人員嘅臨時宿舍事宜，鑑於最近發生相關社會暴力事件同該區居民嘅關注，議程屬於緊急性質，同時有助盡快釋除該區市民嘅特殊關注同避免加深社會疑慮，故此特別安排出席會議。
