政Whats噏：凌晨街拍非法賽車　區議員批當局迴避跟進

本港多區非法賽車問題都相當嚴重，中西區區議員黃永志喺今日(1日)元旦日凌晨上載影片，指佢喺薄扶林道拍攝到非法賽車嘅活動，並產生一浪接一浪嘅引擎噪音。佢又指過去幾個月，每逢周末或者假日區內都會出現非法賽車嘅問題，睡夢中嘅居民屢屢被嘈醒，被迫無奈「觀賞賽事」。<br/><br/>黃永志話非法賽車嘅問題唔單止影響中西區居民，仲有南區以至港島東嘅街坊。佢提到中西區區議會過去一年曾多次要求政府部門跟進有關問題，情況喺舊年5月曾一度有所收斂，但之後又再故態復萌，甚至愈趨惡劣。<br/><br/>黃話區議會方面曾建議執法部門定期喺非法賽車嘅路線架設路障，但當局僅回覆話唔會公開行動細節。佢又建議要裝設俗稱「快相機」嘅偵速攝影機，至少可加強阻嚇力，但當局就只係不斷話會研究喎。