政Whats噏：撐立會以Zoom開會　謝偉俊指性生活亦可在網上解決

為免疫情擴散，唔少機構都採用視像軟件程式工作。早前立法會試用視像軟件Zoom召開非正式會議，一眾議員喺今日(13日)嘅大會上以34票贊成、1票反對、1票棄權下通過議案，由即日起至9月30日，用Zoom召開立法會嘅事務委員會、法案委員會同埋小組委員會等多個委員會會議。議案雖獲通過，但有議員憂慮網絡安全問題，亦有議員以電子上香嚟比喻，視像會議失卻傳統意義，而支持議案嘅議事規則委員會主席謝偉俊，為咗表達網絡會議嘅可行性，竟用上性生活嚟做類比。

醫學界嘅陳沛然，係唯一投棄權嘅議員。陳話曾經喺財委會上質問過政府，點解要花近100萬港元公帑研發視頻會議技術，所得回覆就係指Zoom唔夠安全。又指Zoom曾遭揭露存在密碼洩露、綑綁惡意軟件嘅安裝程序等問題，至於立法會秘書處點樣回應佢對Zoom嘅疑慮，陳就引用歌曲《網絡安全隱患》其中一句歌詞「令你令你令你令你感覺很安全」。議員謝偉銓都對Zoom不無顧慮，擔心會有黑客入侵，將議員改頭換面、換第二把聲音等等。

以保守自居、投反對票嘅熱血公民鄭松泰就話，一個機關喺社會上係有其功能同意義，儘管憑科技手段解決問題，但立法會喺社會上嘅政治意義已經唔同咗。鄭以清明節拜山做例子，反問大家會唔會接受電子上香？鄭指自己會返立法會開會，話鑑於安全問題，因此會借用助理嘅電腦。鄭亦關注到，依家已經冇咗公聽會，用Zoom開會嘅話就變相排除公眾參與，建議秘書處要有行政配套作彌補。

議規會主席謝偉俊解釋，話秘書處已經不斷改善，又話並非要改變立法會嘅性質，使用Zoom開會純粹因應疫情。同時佢亦反駁鄭松泰，話尊重鄭「Old School（老派）」嘅想法，不過愈嚟愈多可網上處理嘅事，例如用電子上香已經好普遍，社會上會隨唔同嘅需要而進步，仲提到話「有啲人講性生活喺網上都解決咗好多」。佢亦指，為免法律爭議，所以唔會用Zoom召開立法會大會、內務委員會同埋財務委員會會議。

其實立法會本身都係一個莊嚴嘅地方，雖然時不時會有議員瞓下覺、打下機，發言亦有特權法保障，之不過咁明目張膽用性生活做例子，又係咪適當呢？