東網電視
更多新聞短片
紓緩熱痱痕癢，林卓廷將牙膏當作「土製止痕膏」咁使用。
1/2
牙膏不單止用嚟刷牙，還可以另有用途！近來天氣漸趨炎熱，被控違反《港區國安法》而還押待審嘅前議員林卓廷(阿廷)同尹兆堅(肥尹)，兩人身上都出現熱痱，不過阿廷就懂得將牙膏當作「土製止痕膏」咁使用，既紓緩熱痱嘅痕癢，又可享片刻清涼咁話。
話說阿廷皮膚上一度消褪嘅熱痱又再出現，雖然已經用藥，但反反覆覆無法斷尾。於是阿廷就擦小量牙膏喺熱痱上面，再用水輕輕搓開，毋須清洗，就可以享受短暫嘅清涼及止痕功效。
另外，阿廷又記得以前睇過嘅電視知識節目，知道頭同頸係人體散熱最快嘅部位，所以佢平時都會用濕毛巾抹頭同頸，又或者索性「洗濕個頭」以保持頭髮濕蘸。至於夜晚就寢嫌熱，阿廷會選擇訓地下，又或者先用水淋濕塊地然後躺臥，涼浸浸有助入眠。
至於肥尹亦同樣受熱痱困擾，皮膚更出現汗癬，目前已按醫生指示擦藥膏，但又要不斷抹汗，盡量令身體乾爽同正常排汗。兩人若果有機會相遇，阿廷會唔會將牙膏嘅妙用，過兩招畀肥尹呢？
尹兆堅出現汗癬，目前已按醫生指示擦藥膏。
