政Whats噏：體操男子全能賽果惹爭議　甘文鋒裁判上身解畫

東京奧運賽事正舉行得如火如荼，觀眾睇比賽都相當肉緊。喺尋晚(28日)嘅奧運體操男子全能決賽，日本選手橋本大輝喺跳馬項目落地不穩兼出界，但仍擊敗中國選手肖若騰奪得金牌，結果惹起裁判偏袒嘅爭議。曾經為男子體操競技擔任國際裁判嘅屯門區前區議員、香港體操總會執委會成員甘文鋒，就忍唔住喺Facebook評論兩句。

甘文鋒解釋，跳馬得分有2項評分值，即「整體演出」同「難度」。橋本大輝嗰一跳難度動作係5.6，如果演出冇瑕疵可得10分，即呢一跳最高得分有15.6分。而落地不穩呢個顯著瑕疵，踏一大步扣0.3分，一隻腳出界扣0.1，合共0.4分。

咁過程評分如何？甘就話第一騰空冇問題，第二騰空開始身體有啲曲扣0.1，轉體時轉速夠，直體保持得很好，但軸心不穩偏向一邊可能扣0.1或0.3，最後是落地預備動作不足扣0.3，基本上就是扣0.5至0.7。反正連落地嘅0.4，佢第一次評14.7，第二次評14.5，同最後出來分數差0至0.2，所以14.7呢個分數係合理咁話。最後佢都提到評分制度應盡量做到客觀公正，唔係憑印象覺得高分定低分，而係要每個分要講得通。總言之，評論體育都要專業，唔識唔好亂評論咁話。