政Whats噏:建制小花植潔鈴訓練受傷辭學警 重返政壇

2021年11月25日 16:42
東網電視
更多新聞短片
植潔鈴已申請重新加入建制政黨。
建制派嘅東區前議員植潔鈴捨棄政途,早前投考警隊而退黨,數數手指,應該呢個月喺學堂畢業,但係就冇乜聲氣,原來佢已因訓練受傷而中途退出咗嘞!
植潔鈴回覆傳媒查詢時話,因為喺警察學堂訓練期間盤骨及腰受傷,已喺9月辭職,並正申請重新入返建制政黨,又指自己已休養一段時間,正做物理治療,但未決定傷癒後會唔會再投考警察。
其實,喺今年年初已有消息話佢退出政圈,並轉行投考督察,當時仲透露植一直都對紀律部隊嘅工作有興趣,而喺2019年區議會選舉敗陣後先萌生棄政轉投紀律部隊嘅念頭。
唔單止因為植係建制「小花」受人注目,而佢曾經同因宣誓風波而被褫奪立法會議席嘅游蕙禎惡鬥,最後要道歉一事,亦曾成為政圈熱話。
話說喺2019年6月中旬,游蕙禎喺網上踢爆植潔鈴盜用相片,更公開埋對話錄音證植潔鈴認衰,事後兩女再度交鋒。植潔鈴拍片回應,解釋話玩通訊軟件Telegram唔用真名同真相係常識,揀相時好好彩揀中游蕙禎,重申自己唔知係游而向佢道歉。
不過,話鋒一轉就笑住話游蕙禎已有一排無露面,暗寸佢潛水多時而唔認得佢,又話張相如網民所言,似某位男演員咁Man,說話相當有骨。
畀人踩到上面嘅游蕙禎亦喺Facebook反擊,話建制派淪落到同本土派道歉係陰功,仲話下次唔好咁話,更叫對方做「游區議員」添!