政Whats噏：唔怕被搶「鼠王」綽號　梁美芬：愈多愈好

擔任「清潔大隊長」嘅政務司副司長卓永興日前話唔好叫佢做「鼠王興」，因為呢個名有專利，驚有「鼠王芬」之稱嘅梁美芬嬲喎。梁美芬就話「鼠王」稱號冇專利，愈多官員議員肯做「鼠王」愈好。

梁美芬今日(18日)喺社交平台貼文，回應老鼠王稱號嘅熱話之外，仲話喺從政之前，佢係大律師及大學教授，唔少朋友唔鍾意「鼠王芬」呢個花名，甚至替佢不值，認為呢個稱呼貶低咗佢。

畀人嗌咗咁多年「鼠王芬」，梁都好受落嘅，仲記得當年佢仲自掏腰包印製《滅鼠天書》派畀街坊添！佢又話覺得議員因為跟進民生議題而得到綽號，係市民對工作嘅肯定，顯示市民記得議員肯放下身段，貼地跟進過鼠患問題。佢仲話官場政界每多一個「鼠王」，就代表有多一個官員及議員願意切實排解民生憂難，係好事嚟，最好區區都有「鼠王」。