重返西班牙　拿華斯尼馬同人唔同命

法甲班霸巴黎聖日耳門今晚深夜會喺歐聯作客皇家馬德里，PSG大軍尋晚飛抵西班牙，其中兩個曾經喺西甲搵食多年嘅球星基羅拿華斯同尼馬自然備受注目。話說當大軍抵達酒店，大批皇馬球迷已經喺度靜候，當前皇馬門神基羅拿華斯步下旅遊巴，皇馬迷就大聲高呼：「基羅，馬德里愛你！」不過，之後到尼馬落車，呢位前巴塞隆拿球星就慘成皇馬迷喝倒彩對象，甚至有人大叫：「去巴塞啦！」搞到場面勁尷尬。<br/><br/>講番今晚場波，尼馬傷愈冇耐，未必會踢正選。賽前主帥杜曹強調，尼馬仲係球隊重要一員：「佢好有責任心，鍾意自己喺球隊有決定性作用。喺重要比賽之中，我哋需要佢。佢係個偉大球員，都係我好友，我希望佢一直留喺我身邊，好難想像巴黎冇咗佢。」之前有傳杜曹唔滿意尼馬早前私下飛去馬德里睇網球賽，似乎依家二人終於和好，可以專心準備比賽喎。<br/><br/>立即參加「賞您睇」：https://tinyurl.com/y2e6pmwk　<br/>Click下面粒掣，儲on.cc coins！機票、家電、超市禮券、過萬份獎品等緊你。