朗奴高文搵基沙文照肺：你踢咩位我話事

《串績王》新登場，最強博彩盤路過關神器：http://win.on.cc/football/　

基沙文今季在巴塞頭3場0入球0助攻，佢認為主要原因係「唔啱位」，佢喺法國隊係踢10號位，但喺巴塞就踢右中場，日前國際賽檔期期間更公開表示：「迪甘斯知我踢咩位」，呢句說話當堂辣着朗奴高文，基沙文歸隊後即被「照肺」。

朗奴高文在記者會上直接回應傳媒有關基沙文嘅言論，佢話：「我已經搵咗基沙文傾偈，我同佢講，我安排佢打右邊，係右路自由人，可以切入射門，至於邊個球員打咩位置，一切由我做決定，我係為球隊好。」

呢位荷蘭籍教頭續道：「基沙文好努力又好有紀律，我作為教練，由我決定球員位置，球員就要交出最好表現，我只能選出11個正選，只有一位中鋒，其他人要踢10號、7號、11號位，仲有2個防中。」

佢仲話：「基沙文有自己喜歡嘅位置，但都冇可能10個球員都踢10號位，我不單為咗基沙文，仲要為整支球隊着想。」巴塞隆拿今晚就要作客基達菲，基沙文聽完朗奴高文訓話，睇吓係咪會好番啲。